كوميكس
قصة مصوره او كوميكس عباره عن فن تصويرى, غالبا ما يتكون من مجموعه صور تحكى احداث متتابعة تكون قصه و يكون نص الكلام ما بين الشخصيات فى رسم ضمن دايرة.
هل الكومكس فن؟
فى كتاب "سكوت مكلاود" المهم: (فهم الكومكس understanding comics) قال : بما ان الكوميكس عمل وضع فى وسط ورقى زى الكتاب لكن يحتوى على رسومات زى اللوح و تنتج تاثيرا بتتابعها زى السينما و لأن كل ده العمل موضوع فى قالب ابداعى .. أدى ذلك الى اعتبارها فنا مستقلا بذاته . و اطلق عليه النقاد المعاصرون الفن التاسع ( راجع فنون الاغريق الخمسة). الكوميكس له لغته البصرية " بالونات ،اطارات ، مسافات بين الاطارات ، ايقونات ، رموز " تعطى احساسا بمرور الزمن اللقطة والتانيه . الكومكس ابتدا كفن ضحل المستوى فى نظر النقاد لكن اصبح فى القرن الواحد و العشرين واحدا من الفنون اللى تعكس ذوق الشعب و تكلمه بطريقته.. فى عالم الرموز و الاشارات اللى تملأ الشوارع و فى عالم تقدم فيه الدراما بالصوت و الصورة لابد أن تكون القراءة مختلفة ... علشان كده الكومكس هى نوع الفن الجديد اللى بيعكس روح انسان القرن العشرين و الواحد و العشرين . و تقديرا لده الفن ابتدا الاحتفال به فى اوروبا و إنشاء جايزة احسن كومكس ف العالم وذلك فى بلدة أنجولم فى فرنسا : مهرجان آنجولم الدولى للشرائط المصورة
البداية
يمكن ان تكون القصص المرسومة على معابد المصريين القدماء و عامود الامبراطور "تراجان" فى روما هما اقدم الكومكس فى العالم. وحدث التطوير لما نقل ده الرسم الى الورق لما قام الفنان التشكيلى الانجليزى ويليام هوجارث بعمل قصص من شوية لوحات متتالية فى سنة 1730 م. و من بعده السويسرى رودلف توبفر اللى اعد تقريبا اول شيء ممكن ان نقول انه ينتمى لده النوع من الفن لما نشر "حكايات السيد جابو" سنة 1830 م.
الكوميكس او الشرايط المرسومة فى وقتنا الحالى
مع بداية القرن العشرين ابتدا ده الفن ينتشر للناس وبدأ "هيرجيه" يقدم " تن تن" أو (تان تان) فى اوروبا. لما ابتدا نشر الكومكس كل أسبوع فى عدد الإجازة الأسبوعية فى أمريكا ازدادت شعبيته و ابتدا شكل الفن يكتمل مع إصدار جورج هيرمان لستريبات "كريزى كات" القطة المجنونة التى صدرت أول مرة فى نيو يورك ايفننج جورنال 1913 و بعدها نشرت فى إصدارات صحفية كثيرة فى نفس الوقت لحد سنة 1944.
التطور من اعتبار الكومكس فن للمتخلفين الى تقدير عالى المستوى
القفزة اخدت شوية مراحل مرة... المرحلة الاولى : فى امريكا فى التلاتينات مع ظهور سوبرمان. لكن المجتمع المحافظ رفض ان يرى اولاده يقرأون ميكى و سوبرمان و وصل الموضوع لتحذيرات من المتخصصين النفسيين بالضرر الممكن حدوثه لعقلية الاطفالاللى يقرأون كومكس و قمة التصعيد كانت وقت العهد المكارسى فى الخمسينيات وعندها تم عمل رقابه على الكوميكس .
و المرحلة الثانيه فى الخمسينات مع ظهور ستان لى و كيربى اللى قدما الاربعه المدهشين و سبايدرمان .
و المرحلة التالته : مع نضوج الفن ده و تقديمه فى شكل الكتب. و هنا لابد للاشارة للعبقرى الامريكى ويل آيزنر اللى قدم لاول مرة مصطلح (جرافيك نوفيل ) او رواية مصورة - رواية معمولة كلها بطريقة الكوميكس- فقدم رواية "عقد مع الرب" و استمر فى نجاحاته لحد مات و دلوقتى اهم جايزة للكومكس ف امريكا تقدم باسمه لكن عيبه انه كان ساعات من اخلاصه و تحمسه لليهودية كان يفقد الموضوعية و لكنه ما يزال من المؤسسين و المطورين وبناة ده الفن . نفس الفترة تشهد نهوض الكومكس اليابانى "المانجا" بظهور الولد الشجاع اللى يقتحم الفضاء للحفاظ على سلامة العالم اسمه " أسترو بوى - و اتقدم ف مصر كارتون باسم فرافيرو- على ايدين "اوسامو تيزوكا". فى نهاية دى الحقبه المعروفة بالعصر الفضى فى السبعينات ابتدا الخارجون عن كل نظام محافظ أمثال "روبرت كرمب " يأسسوا لطريقة جديدة عن طريق رسم وكتابة مجلاته من الغلاف للغلاف ، وجدالناس انه فيه مواضيع يومية حقيقية و رسوماته جعلتها اقرب للشباب من رسومات الصناعة الضخمة و لأنه كان يبيعها ف محطات المترو سموها (الأندرجراوند) على اسم محطات مترو امريكا.
كومكس العصر الحديث من نص الثمانينات
و من اهم رموزه الان مور و نيل جايمان، نقاد ما بعد الحداثة لفتوا النظر لده الفن و من نصف التمانينات اتقدمت اعمال كبيرة و لحد دلوقتى نجد الكتير من "جرافيك نوفيل" من ضمن اهم الكتب اللى بتصدر كل سنه.
أهم الجرافيك نوفيل" او الروايات المصورة
- رجال الحراسة و النكتة القاتلة: تأليف الان مور-
- "ساندمان": تأليف نيل جايمان-
- عالم الاشباح: تأليف ورسوم دانيال كلاوس-
- المنشور " الإينكال": تأليف جودوروفسكى و رسوم ميبيوس
- "بيرسيبوليس": تأليف و رسوم مارجان سترابى-
- جيمى كوريجان اعظم طفل ف العالم: تأليف و رسوم كريس وير
- فلسطين: تأليف و رسوم جو زاكو-
- ماوز: تأليف و رسوم سبيجلمان-
الاشكال
- ستريبس او شريط: شريط واحد يحتوى على شوية اطارات تنتهى فى العاده بموقف مضحك
- جاج او صفحة: فى المجلات و هو كومكس ينتهى بمفارقة مضحكة ، من اشهرهم الشخصية الفرنسية جاستون لاجراف.
- مجلة كومكس:ممكن الحكايه الواحده فيها توصل الى ثلاثين صفحة
- كتاب كومكس او قصة كومكس او جرافيك نوفيل: اكتر من 40 صفحة، فى العاده متألفة خصيصا للطباعة و النشر فى كتاب و ب فيها موضوعات متفاوته جدا من الابطال العاديين للأحلام للروايات الساخرة للسيريالية.